Vwè mizè, pa mò

Tipawòl lasa sé on répons moun ka di souvantfwa lè yo ka mandé yo nouvèl a yo. Sé on jan pou di lavi rèd mé an tout jan sé kyenbé ki ni kidonk yo la.

Ka ki séré alòs dèyè tipawòl lasa ?

Yonn, sa i ka fè nou konprann sé van pé vanté, latè pé tranblé, loraj pé pété, lè lavi ka fè ta’y fò sa touvé la fòs yé pou kontinyé woulé. Antoutjan, kalanswa sa ki fèt, fò pé sa ay andidan nou menm touvé sa ki la ki ké pèwmèt nou kontinyé alé. On mannyè pou di nou osi avè difikilté é tribilasyon a lavi, nou ka aprann nou menm toujou plis. Asiré, ki moun ki po ko janmé viv on sitiyasyon i konprann i pa’a té sa viv. É poutan ! Èspéryans kon sa ka fè réyalizé jan nou fò pasé sa nou té ka kwè. Mé osi, si nou sa gadé zyé wouvè, avè lison ki ka vin avè’y nou pé ankit vwè on lè jan konsyans é konésans nou ni ka laji. Kifè, mizi-an-mizi nou ka vansé, nou pé pran sans a sa nou yé, a fòs nou ni.

Si nou rété anlè chak mòso a pawòl la, nou pé di « vwè mizè » sé pou di adan lavi ki nou vlé ki nou pa vlé, nou ké trapé palaviré. « Pa mò » sé di kan menm sa, fò kontinyé alé. Fòkwè si tout biten té toujou bèl, nou pa té’é fè onlo chimen davwa pa té ké ni ayen pou fè nou boujé é sòti koté la nou yé la.

Pawòl la ka byen fè nou konprann, menm si ka ni fatig é soufrans, tout tan nou ka èspiré, nou pé doubout asi dé pyé. Ni sa ké bigidi o menm tonbé anba pwa a chaj a lavi, mé yo ké pé touvé andidan yo, sa ki fo pou rilévé. É ni sa ké doubout asi janm tou fèb mé avè tan yo ké touvé jan pou rivé fouyé andidan yo menm pou ay chèché fòs lasa. Avè, dòt ké pé la menm touvé la i séré pou doubout kon doubout fèt. Chak moun diféran kidonk chak moun ké vansé jan yo pé pou vwè douvan a yo, mé sa ki fondal sé yo ké toujou ni sa ki fo pou kontinyé alé davwa tout biten la andidan yo menm.

Jan nou ka vwè an lèspri an nou ka fè diférans la. Fò vlé vwè nou ni fòs lasa adan nou pou pé sa ay chèché’y. Sé pou sa osi « pa mò » la pòtalan davwa fò aksèpté konswa toujou ké ni pòt ouvè. Mi sé sa tipawòl lasa ka envité nou kyenbé an kabèch an nou pou ayen andèwò an nou pa vin chouboulé moun nou yé.

Pawòl sajès,

Pawòl ki richès !

Awtik lasa parèt pou prèmyé fwa anlè : https://www.sayanns.com