Sé grenn diri ka plen sak diri

Menm jan yonn é yonn ka fè dé, piti é piti sanblé an kantité pé fè gran. Sé pou sa granmanman toujou pran tan di : sé grenn diri ka plen sak diri. Mé ka nou pé touvé anplis dèyè pawòl lasa ?

Menm si enpé adan yo souvantfwa yo pa té ni onlo, moun lontan té sav té fo gadé èspwa é kyenbé kè pou vansé davwa yo té asiré avè tan yo té ké vwè douvan a yo. Pou-tout-bon, yo té sèten mété tikrazi é tikrazi a koté, on lè té’é ba yo on dèkwa an dé men a yo. Tou sèl o a plizyè, yo té sav : mété ansanm sa yo té ni, té’é ba yo plis. Sé sa ki fè, kon adan enpé dòt koté asi latè, moun té ka fè sa yo ka kriyé sousou. Ni sa, yo sé jiminé yo té ka jiminé kon yo pé pou rivé fè pòtmonné a yo pitité.

Osi, pawòl lasa ka fè nou sonjé aksyon dèyè aksyon ka bay rézilta. Souvantfwa, nou enmé vwè an gran é nou ka konprann sé adan on batzyé tout biten pou fèt. Mé a pa toujou sa ! Ayen pa’a di on sèl waka pa ni asé pou on moun rivé. Mé, pli-souvan-ki-rarman, sé travay ka menné. Lè nou ka vwè on moun monté ho, nou pa’a toujou réyalizé sé lanné é lanné éfò é détèwminasyon ki pèwmèt sa. Nou enmé vwè an gran é nou ka konsidéré nou pa mérité mwens ki sa. É sa byen vré ! Si nou pé ni gran lidé, sé byen davwa nou pé woulé pou fè yo vwè jou. Mé fò nou kapab osi konsidéré nou mérité nou menm fè sa ki fo pou nou, pou nou réyisi an sa nou vlé. Adonk, fò nou sa kwè an nou menm asé fò pou nou pran tan ki fo pou fè é mizi-an-mizi simé pou rékòlté apré. Konstriksyon pa’a fèt adan on sèl jou. Sa pi vré ankò lè yo fèt solid. É sa pòtalan davwa pasé on rézilta adan sa nou ka fè, nou ka trapé èspéryans é sé nou menm osi nou ka konstwi. Sé alòs ban nou posibilité vin pli fò. Fò pa nou pè sa, okontrè sé sa ka pèwmèt nou doubout pi byen asi dé pyé an nou. Sé fòs nou ka trapé pou dépasé limit nou té’é pé ni é rivé pli lwen. Pasé rivé adan on biten, sé fè chimen nou ka fè chimen an konsyans a nou menm.

Épi, adan sa nou ka fè, nou pa oblijé sa fè sa ki pi méyè la menm. Mé, piti kon i yé, si nou pran tan fè, travay an nou avè tan, afòs afòs ké vin pli bon. Kidonk, fò konprann konparé avè sa ki ni o ki pé fè plis pa’a sèvi nou. Si sé piti nou pé fè, annou fè kon nou pé avè lanmou an kè an nou é chak lè sa ké posib, nou ké ranjé sa ki fo tibwen plis. Sa ka konté, sé nou chak asi latè, adan sa nou bon adan, nou pran tan fè on biten davwa chak aksyon ké pòté fwi. Sé tou sa ki ké fè limanité ay pi byen. Tout moun pé pa menm koté la, an menm moman la. Nou pa menm oblijé chèché ay menm koté la. Mé, nou chak asi latè pou éséyé bay sa nou ni ki méyè andidan nou kon nou pé davwa sé sa ki ké pèwmèt chak moun vansé. É anfinaldikont, adan balan lasa, sé kréyé nou ké ka kréyé on monn ki méyè.

Pawòl sajès,

Pawòl ki richès !

Awtik lasa parèt pou prèmyé fwa anlè : https://www.sayanns.com